कोशी प्रदेशका ८ लाख ९३ हजार बालबालिकालाई दादुरा–रुबेलाको खोप लगाइने भएको छ।
फागुन १३ देखि सुरु हुने अभियान अन्तर्गत कोशी प्रदेशका ९ महिनादेखि १५ वर्षसम्मका ८ लाख ९३ हजार ९ सय ३४ जना बालबालिकालाई खोप लगाइने प्रदेश स्वास्थ्य निर्देशनालय धनकुटाका निर्देशक ज्ञानबहादुर बस्नेतले जानकारी दिए।
अभियानअन्तर्गत कोशी प्रदेशमा फागुन १३ देखि चैत ३ गतेसम्म खोप लगाइने कार्यक्रम रहेको निर्देशक बस्नेतले बताए।
राष्ट्रिय अभियान फागुन १३ देखि चैत ७ गतेसम्म भए पनि कोशी प्रदेशमा चैत ३ गतेभित्रमा लक्षित जनसंख्यालाई खोप लगाइसकिने तयारी गरिएको उनले बताए।
फागुन १३ गते कोशी प्रदेशका भोजपुर, तेह्रथुम, मोरङ र उदयपुरमा खोप लगाउँदै अभियानको शुभारम्भ गरिने छ। अन्य १० जिल्लाले फागुन १६ देखि २७ गतेसम्ममा अभियान सुरु गरी चैत ३ गतेभित्रमा सम्पन्न गर्ने लक्ष्य बनाएको निर्देशक बस्नेतले बताए।
स्वास्थ्य मन्त्रालयमा भएको प्रदेश स्तरीय खोप समन्वय समितिको बैठकमा स्वास्थ्य निर्देशनालयका खोप अधिकृत भरत भण्डारीले कोशी प्रदेशमा ९ महिनादेखि ५९ महिनासम्मको जनसंख्या ३ लाख ६४ हजार ७ सय ६ र ५ वर्षदेखि १५ वर्षको जनसंख्या ५ लाख २९ हजार २ सय २८ रहेको जानकारी दिए।
उनले लक्षित जनसंख्याको सबैभन्दा बढी झापा, मोरङ र सुनसरीमा खोप लगाउनुपर्ने बताए। भण्डारीका अनुसार मोरङका लक्षित जनसंख्याको ३१ प्रतिशत, झापा र सुनसरीमा २६–२६ प्रतिशत रहेको छ।
प्रदेशभरका ८ हजार ३ सय ६६ खोप केन्द्रमा १२ हजार ६ सय १८ स्वास्थ्यकर्मीले खोप लगाउने उनले बताए। दक्षिण पूर्वी एसियाबाट सन् २०२६ सम्ममा दादुरा–रुबेला निवारण गर्ने लक्ष्य राखिएको छ। सोही अनुसार राष्ट्रिय व्यापी अभियान सुरु गर्न लागिएको हो।
यसअघि नेपालले सन् २०१९ र पछि सन् २०२३ मा निवारणको लक्ष्य लिए पनि सम्भव नभएपछि सन् २०२६ लाई निर्धारण गरिएको खोप अधिकृत भण्डारीले बताए।
उनका अनुसार सन् २०२२–२०२३ मा नेपालको धेरै जिल्लाहरुमा दादुरा–रुबेलाका बिरामी देखा परेर महामारी फैलिएपछि २०२६ लाई लक्ष्य निर्धारण गरिएको हो।
दादुरा–रुबेला निवारणका लागि दादुरा खोपको दुवै (पहिलो र दोस्रो) मात्राको प्रगति सबै तहमा ९५ प्रतिशतभन्दा धेरै भएको हुनुपर्ने आधार र सर्तहरू रहेको छ।
प्रति १ लाख जनसंख्यामा वार्षिक कम्तीमा २ जना शङ्कास्पद बिरामीको पहिचान भई प्रयोगशाला परीक्षणमा दादुरा नेगेटिभ भएको हुनुपर्ने, दादुरा–रुबेला निवारण गर्न परिभाषित भौगोलिक क्षेत्रमा कम्तीमा १२ महिनासम्म स्थानीय दादुरा–रुबेलाका रोगी देखा नपरेको हुनुपर्ने र ३ वर्षसम्म सोही अवस्था कायम भएमा दादुरा–रुबेलाको अवस्था शून्य भएको मानिन्छ।
दादुरा–रुबेला एक सङ्क्रमित व्यक्तिबाट १५ देखि १८ जना सम्मलाई संक्रमण हुने विज्ञहरुको भनाइ छ।
प्रकाशित: 8 फागुन 2080 20:20 मंगलबार