कालिका पावर कम्पनी लिमिटेडले आफ्ना सेयर धनीलाई दिने बोनस सेयर घटाएको छ। अघिल्लो वर्ष १५ प्रतिशत बोनस सेयर दिएको कम्पनीले चालु आर्थिक वर्षमा पाँच प्रतिशत घटाएर १० प्रतिशतमा झारेको हो।
कम्पनीको आज भरतपुरमा भएको १६औँ वार्षिक साधारणसभाले चुक्त्ता पुँजीको १० प्रतिशत बोनस सेयर दिने निर्णय गरेको छ।
कम्पनीको गत आर्थिक वर्ष सञ्चित मुनाफा चुक्ता पुँजी ७९ करोड ३५ लाख रुपैयाँ छ। त्यसको १० प्रतिशतले हुन आउने सात करोड ९३ लाख रुपैयाँ बोनस सेयर दिने निर्णय भएको कम्पनीका लेखा अधिकृत प्रविन थपलियाले जानकारी दिए।
कम्पनीले घोषणा गरेको लाभांस विद्युत् नियमन आयोगबाट स्वीकृत गरेपछि सेयर धनीले पाउनेछन्।कम्पनीले कर प्रयोजनका लागि ०.५२ प्रतिशत नगद लाभांशसमेत दिनेछ। त्यसका लागि ४१ लाख ७६ हजार ३१६ रुपैयाँ स्वीकृत भएको छ।
कम्पनीको गत वर्षको नाफासमेत घटेको छ। कम्पनीले आर्थिक वर्ष २०७९-०८० मा ७ करोड ३६ लाख ८९ हजार दुई सय ५४ रुपैयाँ खुद मुनाफा आर्जन गरेको छ। अघिल्लो आर्थिक वर्ष आठ करोड ११ लाख २८ हजार रुपैयाँ खुद मुनाफा आर्जन गरेको थियो। यस वर्ष समयमा पानी नपर्दा विद्युत् उत्पादनमा कमी आएको कम्पनीका लेखा समितिका सदस्य सुरेन्द्र पाण्डेले जानकारी दिए।
वार्षिक साधारण सभाले कम्पनीको पुँजी वृद्धि गर्न नियम संशोधनसमेत गरेको छ। संस्थाले दरौदी ग्यासियर हाइड्रोअन्तर्गतको २०६४ सालमा स्थापना भएको कालिका पावर कम्पनीले गोरखाको अजिरकोट गाउँपालिकास्थित दरौदी खोलाबाट विद्युत् उत्पादन गरेको छ।
गत वर्ष मात्रै कम्पनीले तीन करोड आठ लाख ९८ हजार हजार युनिट विद्युत् उत्पादन गरेको थियो। त्यसबाट १९ करोड १७ लाख ७५ हजार ७९२ रुपैयाँ आम्दानी गरेको कालिका पावरले जानकारी दिएको छ।
२०७३ सालबाट विद्युत्को व्यापारिक उत्पादन प्रारम्भ गरेको कालिका पावरले ६ हजार किलोवाट क्षमताको जलविद्युत् उत्पादन गर्ने लक्ष्य राखेको छ।
कालिका पावरको संस्थापक सेयर धनी पुँजी ७० प्रतिशत र सर्वसाधारण पुँजी ३० प्रतिशत रहेको छ। कम्पनीले गोरखाको दरौदी खोलामा प्रस्तावित माथिल्लो दरौदी बी साना विद्युत् आयोजना र माथिल्लो दरौदी सी साना जलविद्युत् आयोजनामा ५० प्रतिशत सेयर राख्ने निर्णयसमेत गरेको छ। यी दुईवटा आयोजनाले १७.८५ मेगावाट विद्युत् निकाल्ने लक्ष्य राखेको छ।
यस कम्पनीको सञ्चालक समितिका अध्यक्ष विक्रम पाण्डेको अध्यक्षतामा कार्यक्रम भएको थियो।
प्रकाशित: २८ पुस २०८० १५:३५ शनिबार