नेपाली कांग्रेसका केन्द्रीय सदस्यहरूले पार्टीबाट सरकारमा सहभागी नेताहरूले जनहितमा काम गर्न नसकेको आरोप लगाएका छन्। देश, जनता र पार्टीको हित भन्दा मन्त्रीहरू आफू र गुटको पक्ष पोषणमा लागि परेको केन्द्रीय सदस्यहरूले आरोप लगाएका हुन्।
पार्टी केन्द्रीय कार्यालय सानेपामा बिहीबार देखि सुरु भएको केन्द्रीय समितिको दोस्रो दिनको बैठकमा बोल्ने अधिकांश सदस्यहरूले मन्त्रीहरूले अहिलेको कार्यशैली तत्काल परिवर्तन गर्न आग्रह गरेका छन्।
केन्द्रीय सदस्यहरू चन्द्रकान्त भण्डारी, रामहरि खतिवडा, राजीवविक्रम शाह, डा. चन्द्रमोहन यादव, प्रकाश रसाइली स्नेही, गोविन्दराज पोखरेल, अजयवावु शिवाकोटीसहितले जनताले पार्टी सरकारमा भएको अनुभूति गर्न नसकेको गुनासो गरे।
मन्त्री भएका नेता मात्र गोरो भएको भन्दै केन्द्रीय सदस्य खतिवडाले भने, ‘सरकारमा सहभागी भएपछि मन्त्रीहरू गोरा र राम्रो हुने जनता चाहिँ कालो हुने अवस्थाको अन्त्य हुनुपर्छ। अहिले जनता कालो बन्ने मन्त्री गोरो हुने मात्र भयो।’
बैठकमा बोल्ने अधिकांश सदस्यहरूले अघिल्लो निर्वाचनमा कुनै पनि तहमा पराजित नेताहरूलाई राष्ट्रिय सभाको उम्मेदवार नबनाउन आग्रह गरेका छन्।
एउटै नेतालाई केन्द्रीय सदस्य, सांसद, मन्त्री बनाइएको भन्दै सदस्यहरूले गुट, नाता र दातालाई नभएर पार्टीमा अवसर नपाएका तथा बुद्धिजीवीलाई अवर दिनु पर्ने तर्क गरे। एउटै ढुंगालाई कहिले एकातिरबाट अहिले अर्कोतिर पल्टाउने परम्परा पार्टीमा बढ्दै गएको भन्दै केन्द्रीय सदस्यहरूले अब त्यसको अन्त्य हुनु पर्ने धारणा राखे।
केन्द्रीय सदस्य गोविन्दबहादुर शाहले राष्ट्रिय सभा निर्वाचनका लागि उम्मेदवार छनोटका लागि मापदण्ड बनाउनु पर्ने धारणा राखे। अहिलेको निर्वाचन प्रणाली माथिसमेत प्रश्न उठाउँदै सदस्यहरूले प्रतिनिधिसभालाई प्रत्यक्ष निर्वाचित र राष्ट्रिय सभालाई समानुपातिक बनाउनु पर्ने उनको तर्क थियो।
सदस्यहरूले प्रतिनिधिसभामा समानुपातिक व्यवस्था हटाउनु पर्ने तर्क गर्दै अधिकांश सदस्यहरूले अहिलेको निर्वाचन प्रणालीमा सुधार गर्नुपर्ने औँल्याएका छन्।
प्रतिनिधिसभाको तेस्रो ठुलो दलले सरकारको नेतृत्व गर्ने पहिलो र दोस्रो दल सहभागी बन्नु पर्ने अवस्था आएको भन्दै केन्द्रीय सदस्य दिनेश कोइरालाले अहिलेको निर्वाचन प्रणालीले देशको हित नगर्ने तर्क गरे।
बैठकमा केन्द्रीय सदस्यहरूले संसद्मा पार्टीको भूमिका प्रभावकारी हुन नसकेको गुनासो गरेका थिए। संसद्मा पार्टीको उपस्थिति कमजोर भएको भन्दै केन्द्रीय सदस्य प्रकाश रसाइली स्नेहीले देशभित्र र बाहिर पनि पार्टीले अभियान सञ्चालन गर्नुपर्ने धारण राखे।
पार्टीले सञ्चालन गरेका र गर्न लागेका अभियानहरू प्रभावकारी हुन नसकेको आरोप लगाउँदै सदस्यहरूले भ्रातृ संगठनहरूलाई चुस्त बनाउन पनि आग्रह गरेका छन्। केन्द्रीय सदस्य गोविन्द पोखरेलले त पार्टी महामन्त्रीहरूलाई अभियानका कार्यक्रम नभएर निर्वाचन घोषणापत्र कार्यान्वयनमा लाग्न जोड दिएका छन्।
बैठकमा बोल्ने सदस्यहरूले पार्टीमा वरियताका विवाद तत्काल सुल्झाउन आग्रह गरेका छन्। वरियता विवादले पार्टीभित्रको किचलो सडकमा पुगेको भन्दै सदस्यहरूले असन्तुष्टि जनाएका छन्।
बैठकमा मन्त्रीहरू प्रकाशशरण महत, एनपी साउद, सीता गुरुङले आआफ्नो मन्त्रालयको प्रगति विवरण सुनाएका थिए। बैठकमा शनिबार पनि बस्नेछ।
प्रकाशित: १३ पुस २०८० २०:४४ शुक्रबार