पोखरा । नेकपा (एमाले) कास्कीको ११ औं जिल्ला अधिवेशनबाट खगराज अधिकारीनिकटका उम्मेदवारले बाजी मारेका छन् । केही महिनाअघि एमाले गण्डकीको चुनावमा भने अर्का गुट पृथ्वीसुब्बा गुरुङ प्यानलले चुनाव जितेको थियो ।
५ दिनदेखि पोखरामा भएको अधिवेशनअन्तर्गत अनेक सहमति प्रयास विफल बनेपछि इलेक्ट्रिक भोटिङ आधारमा नेतृत्व छिनोफानो लगाइएको हो । मतदानमा खगराजनिकट उम्मेदवार बैनबहादुर अधिकारी क्षेत्री अध्यक्षमा निर्वाचित भएका हुन् । पदाधिकारीमा अधिकारी समूह नै हावी हुँदा अन्य अधिकांश पदमा पनि सोही समूहका उम्मेदवारले चुनाव जिते ।
अध्यक्षका निकटतम् प्रतिस्पर्धी माधव बास्तोलालाई २ सय ४ मतअन्तरले पराजित गर्दै निर्वाचित बैनबहादुरले कुल खसेको ९ सय १५ मतमा ५ सय ५१ मत प्राप्त गरे । बास्तोलाले ३ सय ४७ र विवेक त्रिपाठीले १७ मात्र मत ल्याए । जिल्लाको चुनावमा खगराज–पृथ्वीसुव्वा प्यानलका उम्मेदवार प्रतिस्पर्धामा रहँदा अध्यक्षमा त्रिपाठी स्वतन्त्र उम्मेदवार बनेर चुनाव लडेका थिए ।
उपाध्यक्ष पदमा खगराजनिकट भेषराज बराल उपाध्यक्ष निर्वाचित भए । उनले ५ सय २७ मत प्राप्त गर्दा उपाध्यक्षका प्रत्यासी शिवप्रसाद आचार्यको पक्षमा ३ सय ८८ मत परेको छ ।
खगराज निकटकै दर्शन लामा सचिव चुनिए । उनले सुरेन्द्र गुरुङलाई हराएका हुन् । लामाले ५ सय ९५ मत प्राप्त गर्दा गुरुङले ३ सय २० मत प्राप्त गरेको प्रमुख निर्वाचन अधिकृत भगवती पहारीले जानकारी दिइन् ।
उपसचिवमा लालबहादुर परियार ५ सय ८१ मत प्राप्त गर्दै निर्वाचित हुँदा प्रत्यासी गीतादेवी विश्वकर्माले ३ सय ३४ मत ल्याइन् । उपसचिव (महिला) मा सन्तुदेवी सुवेदी निर्वाचित भइन् । सन्तुदेवीले ५ सय १० प्राप्त गर्दा राधिका शाही योगीले ३ सय ४४ र संगीता सुवेदीले ६१ मत मात्र ल्याए ।
१ सय २१ सदस्यीय कार्यसमितिमा खुलातर्फ ५ जिल्ला सदस्यमा मोहन सुवेदी, तोरणबहादुर बानियाँ, झपट रानाभाट, इमानराज पौडेल र बलराम पौडेल निर्वाचित भए ।
महिला सदस्यमा उषा बरुवाल, विष्णु सुवेदी र कल्पना भुँवाजी क्षेत्री चुनिए । जिल्ला सदस्य युवामा ११ जना निर्वाचित भए । ३५ जना प्रतिस्पर्धामा रहेकोमा रामचन्द्र तिमिल्सिना (आरसी), इ.सुनिल तिमिल्सिना, अमृत ढकाल, ईश्वर अधिकारी, प्रदीप गुरुङ, सुनिल गुरुङ, कार्लोस गुरुङ, निरेश अधिकारी, योगेन्द्र पौडेल क्षेत्री, विश्वज्योति सुवेदी र विक्रम रायमाझी निर्वाचित भए ।
४५ क्लस्टरमध्ये विभिन्न क्लस्टरबाट ७ जना निर्विरोध भएका थिए । निर्विरोध हुनेमा अपांगतातर्फ गंगाबहादुर खड्का, बुद्धिजीवीमा दुर्गा भण्डारी र विजय शर्मा, मादी गाउँपालिका (महिला) मा कल्पना गुरुङ र विष्णुमाया पौडेल तथा रुपा (महिला) मा कशिरन मियाँ र हिताकुमारी रुपाखेती ‘सार्की’ हुन् ।
नवनिर्वाचित अध्यक्ष तथा लेखा समिति अध्यक्षलाई बुधबार नै प्रमुख निर्वाचन अधिकृत भगवती पहारीले पद तथा गोपनीयताको सपथ खुवाइन् । निर्वाचित बैनबहादुर अधिकारी क्षेत्रीले आफू पार्टीको एक सिपाही भएको बताउँदै सम्पूर्णलाई धन्यवाद दिए ।
२०७४ सालको आमनिर्वाचनयता गण्डकी प्रदेशमा दुई गुट हावी हुँदै आएको पाइन्छ । जसको असर गत वर्ष पोखरा महानगरपालिकाको मेयरको चुनावमा समेत परेको थियो ।
(१ पटक भ्रमण गरिएको, आज १ पटक भ्रमण गरिएको)