महिलाहरूले उत्पादन गरेका घरेलु उत्पादनको ब्राण्डिङ तथा प्रवर्द्धन गर्नका लागि अन्तर्राष्ट्रिय महिला उद्यमी व्यापार मेला हुने भएको छ। महिला उद्यमी महासङ्घ नेपाल (एफवीन) ले मेला आयोजना गर्न लागेको हो।
चैत्र १६ गतेदेखि २० गतेसम्म ललितपुरको हेरिटेज गार्डेन सानेपामा मेला आयोजना गरिएको महिला उद्यमी महासङ्घ नेपाल (एफवी) की अध्यक्ष शोभा ज्ञवालीले जानकारी दिइन्। ज्ञवालीका अनुसार मेलामा ५० हजार अवलोनकर्ताहरु आउने र करिब पाँच करोडको कारोबार हुने अनुमान गरिएको छ।
विभिन्न जिल्ला तथा ग्रामीण क्षेत्रमा बसोबास गर्ने सफल महिला उद्यमीलाई उद्यमशीलताको पहिचान, प्रोत्साहन र हौसला बढाउने उद्देश्य यस मेलाको आयोजना गरिएको अध्यक्ष ज्ञवालीले बताइन्।
आयोजकका अनुसार मेलाको उद्घाटन प्रधानमन्त्री पुष्पकमल दाहालले गर्ने कार्यक्रम रहेको छ। महासङ्घले शुक्रबार पत्रकार सम्मेलन गरेर उक्त व्यापार मेला आयोजना गर्न लागिएको जानकारी दिइएको हो।
७ औँ अन्तर्राष्ट्रिय महिला उद्यमी व्यापार मेलाले स्थानीय उत्पादनलाई प्रोत्साहन हुने अपेक्षा गरिएको छ। अन्तर्राष्ट्रिय महिला उद्यमीहरूको व्यापार मेलाले उद्यमी महिलाहरूको सीपबाट तयार गरिएका सामानको बिक्रीमा सघाउ पुग्ने छ। मेलाले महिलाका उत्पादनलाई राष्ट्रिय तथा अन्तर्राष्ट्रिय बजारमा पहिचान बनाउन सघाउ पुर्याउने अध्यक्ष ज्ञवालीले बताइन्। मेलामा स्थानीय तहदेखिका केन्द्रसम्मका साना तथा ठूला महिला उद्यमीका एक सय भन्दा धेरै स्टल रहनेछन्। व्यापार मेलामा नव महिला उद्यमी, अपाङ्गता भएका महिला उद्यमीहरूका लागि पनि स्टलको व्यवस्था गरिएको छ।
मेलामा स्वदेशका महिला उद्यमी लगायत भारत, पाकिस्तान, बङ्गलादेश लगायतको मुलुकका महिला उद्यमीहरूका उत्कृष्ट उत्पादनहरू रहने महासङ्घकी प्रथम उपाध्यक्ष दर्शना श्रेष्ठले जानकारी दिइन्।
मेलामा महिला उद्यमीहरूले उत्पादन गरेका पहिरनका साथ र्याम्प वाक पनि गरिनेछ। मेलामा उत्कृष्ट महिला उद्यमीहरूलाई प्रोत्साहन गर्न विभिन्न विद्यामा उत्कृष्टताको प्रमाणपत्र प्रदान गर्ने कार्यक्रम पनि रहेको छ । मेलामा महिला उद्यमीहरूको सङ्घर्षका कथा समेटिएको पुस्तक समेत सार्वजनिक गर्ने कार्यक्रम रहेको छ।
प्रकाशित: ९ चैत्र २०८० २०:३९ शुक्रबार