नेकपा (एमाले) का वरिष्ठ उपाध्यक्ष ईश्वर पोखरेलले कोशी प्रदेशको नामाकरणको विषयलाई लिएर भइरहेको आन्दोलनप्रति आपत्ति जनाएका छन्।
वरिष्ठ उपाध्यक्ष पोखरेलले विधि र प्रक्रियासम्मत ढंगले आफैँले प्रदेशको नाम कोशी राख्ने र पछि एमालेलाई आरोपित गरेर मारकाटमा उत्रन नमिल्ने वरिष्ठ उपाध्यक्ष पोखरेलको जिकिर थियो। आईतवार झापाको बिर्तामोडमा स्थानीय सञ्चारकर्मीमाझ उहाँले विधि र प्रक्रियालाई मिचेर मारकाटमा उत्रने कुनैपनि खालको गतिविधिबिरुद्ध एमाले लाग्ने चेतावनी समेत दिए। वरिष्ठ उपाध्यक्ष पोखरेलले कोशी प्रदेशको नामाकरण एमालेको कुनै कमिटीले निर्णय गराएको हो र ? भनि प्रश्न गरे। उनले कोशी प्रदेशमा पहिचानको नाममा भइरहेका गतिविधि सामाजिक सद्भाव बिथोल्ने खालको भएको आरोप समेत लगाए।
वरिष्ठ उपाध्यक्ष पोखरेलले भने, ‘मधेस प्रदेशको बारेमा एमालेका फरक दृष्टिकोण थियो। हामीले मिथिला वा केही राख्नुपर्छ भनेका थियौं। तर प्रक्रियाबाट टुंगो भयो, सक्कियो नि। मधेश प्रदेश राखियो। सिद्धियो। अब त्यसमा हामीले यो भएन भनेर बितण्डा गर्न मिल्छ ? मिल्दैन नि। एउटा प्रक्रियाबाट दिउँसै खुलेआम प्रक्रियाबाट सहभागि भएर मोर दयान नाईन्टी पर्सेन्टले भोट हालेर टुंग्याएको विषयप्रति फेरी यस्तो र त्यस्तो भन्न मिल्छ यदि त्यस्तो हो भने पनि। यसको आफ्नै विधि र प्रक्रिया छ नि। के मारकाटमा उत्रेर त्यो समस्याको समाधान हुन्छ? म के भन्न चाहन्छु भने–मारकाटमा उत्रेर कुनै पनि खालको समस्याको समाधान खोजिन्छ भने त्यो किमार्थ सम्भव हुँदैन। नेकपा एमाले त्यसको विरुद्धमा रहन्छ। होइन संवैधानिक प्रक्रियाले, शान्तिपूर्ण प्रक्रियाले, विधिसम्मत ढंगले कसैले पनि यो भएन, यो हुनुपर्छ । यो होइन, त्यो हुनुपर्छ भन्न सक्छ। यो स्वभाविक कुरा हो। तर त्यो भन्दा फरक ढंगले के एमालेले आफ्नो कमिटीको निर्णय गराएको हो त्यो? कि प्रदेशसभाको तर्फबाट निर्णय भएको हो। प्रदेशसभामा त सबै थिए। बरु त्यस्ता साथीहरुले त कहाँ सोध्नुपर्छ भने हिजो ती सचेत थिए कि थिएनन ? उपस्थित हुँदाहुँदै भोट हालेर प्रदेशको नाम टुंगो गर्ने। एमालेका नेता कोही आएर त्यहाँ खबरदार यो गर भनेर लागू हुन्थ्यो, लागू हुनसक्छ? यसको जवाफ कसले दिने? यो त्यसकारणले सामाजिक सद्भावलाई अलिकति अस्वस्थ बनाउने, यसलाई बिगार्ने हिसावले कसैले पनि काम गर्नुहुँदैन। यो गलत कुरा हुन्छ।’
प्रकाशित: २ पुस २०८० १८:०५ सोमबार