गत आर्थिक वर्षको तुलनामा चालु आर्थिक वर्षको ७ महिनाको अन्तरालमा व्यापारघाटासँगै आयात निर्यात पनि घटेको छ ।

गत वर्षको साउनदेखि माघसम्ममा ८ खर्ब २५ अर्ब ७३ करोड ३० लाख ९ हजारको व्यापार घाटा भएकोमा चालु आवको सोही अवधिसम्ममा व्यापार घाटा १.७७ प्रतिशतले घटेको हो ।

चालु आवको पहिलो ७ महिनामा कुल व्यापार घाटा ८ खर्ब ११ अर्ब ११ करोड २९ लाख ८८ हजार रुपैयाँ रहेको छ । भन्सार विभागका अनुसार ७ महिनाको अवधिमा ८ खर्ब ९४ अर्ब ३८ लाख ९९ हजार रुपैयाँको आयात भएको छ । गत वर्ष सोही अवधिमा ९ खर्ब १९ अर्ब १६ करोड ५३ लाख ४८ हजार रुपैयाँको आयात भएको थियो । गत वर्षभन्दा अहिले २ दशमलव ३१ प्रतिशतले आयातमा कमी आएको छ ।

७ महिनामा ८ खर्ब ११ अर्बको व्यापार घाटा यथावत

यसैंगरी गतवर्षको पहिलो ७ महिनामा ९३ अर्ब ४३ करोड २३ लाख ३८ हजारको निर्यात भएकोमा चालु आवमा ८६ अर्ब ८३ करोड ९ लाख १२ हजार निर्यात भएको छ । यो गत वर्षको तुलनामा ७ प्रतिशतले कम हो ।

भन्सार विभागका अनुसार ७ महिनाको अवधिमा सवैभन्दा वढी व्यापार घाटा विगतमा झैं भारतसँग रहेको छ । भारतबाट ५ खर्ब ५४ अर्ब ७५ करोड ८८ लाख ४१ हजारको सामान आयात हुँदा भारततर्फ जम्मा ५८ अर्ब ७२ करोड ३७ लाख ९९ हजारको निर्यात भएको छ । भारतसँग मात्र नेपालको व्यापार घाटा चार खर्ब ९६ अर्ब तीन करोड ६० लाख रहेको छ ।

यसैंगरी चीनसँग नेपालको व्यापार रहेको छ । साउनदेखि माघ मसान्तसम्ममा चीनबाट एक खर्ब ७३ अर्ब नौ करोड ११ लाख बराबरको मालवस्तु आयात भएको छ भने एक अर्ब ८५ करोड ४८ लाख बराबरको निर्यात भएको छ ।

त्यस्तै चालु आवको सात महिना अवधिमा संयुक्त अरब इमिरेट्सबाट १५ अर्ब ६९ करोड ५४ लाखको आयात भएको छ भने एक अर्ब ५८ करोड ३३ लाख बराबरको निर्यात भएको छ । यो मुलुकसँगको व्यापार घाटा रू १४ अर्ब ११ करोड २० लाख छ ।

नेपालको व्यापार घाटा रहेका अन्य मुलुकहरुमा क्रमशः युक्रेन, मलेसिया, अस्ट्रेलिया, इन्डोनेसिया, फ्रान्स, अर्जेन्टिना, ओमान, थाइल्यान्ड, ताइवान, साउदी अरेविया, जापान, भियतनाम, सिंगापुर, क्यानाडा, बेलायत रहेका छन् । नेपालले १२९ देशसँग घाटाको व्यापार गरेको छ ।

व्यापार नाफा भएका मुलुकहरुमा अमेरिका, डेनमार्क, नर्वे, अफगानिस्तन, न्यू क्यालेडोनिया, माल्दिभ्स, लाटभिया, मौरिसस, माल्टा, आइसल्यान्ड, क्रोयसिया रहेका छन् ।

सात महिना अवधिमा अमेरिकाबाट नौ अर्ब १७ करोड ५८ लाख बराबरको वस्तु आयात हुँदा नेपालबाट नौ अर्ब ५४ करोड छ लाख बराबरको निर्यात भएको छ । अमेरिकासँगको नेपालको व्यापार नाफा ३६ करोड ४७ लाख रुपैयाँ रहेको छ । डेनमार्कसँग मात्र २७ करोड ८४ लाख ८१ हजार रुपैयाँको व्यापार नाफा रहेको छ ।

भन्सार विभागका अनुसार नेपालको व्यापार घाटा वढ्नुमा पेट्रोलियम पदार्थको आयातले सवैभन्दा वढी हिस्स ओगटेको छ । ७ महिनाको अवधिमा ७७ अर्ब ४१ करोड ९८ लाख बराबरको डिजेल, ३८ अर्ब ८२ करोड ६३ लाख बराबरको पेट्रोल र ३० अर्ब ३१ करोड २४ लाख बराबरको एलपी ग्याँस आयात भएको छ । त्यस्तै, फलामजन्य सामग्री २२ अर्ब ६६ करोड रुपैयाँको र १७ अर्ब ३८ करोड ३६ लाख बराबरको स्मार्टफोन आयात भएकोे छ ।

आयात निर्यातको परिमाणको आधारमा पहिलो सात महिनामा नेपालको कुल वैदेशिक व्यापार नौ खर्ब ८४ अर्ब ७७ करोड रुपैयाँको भएको छ । गत आर्थिक वर्षको त्यही अवधिमा १० खर्ब १२ अर्ब ५९ करोड रुपैयाँको कुल वैदेशिक व्यापार भएको थियो ।

सात महिनामा २२ अर्ब ६६ करोडको स्टिल प्यालेटबाट बनेका सामान, २१ अर्ब ६१ करोडको आइरन र स्टिल रोल, १७ अर्ब ३८ करोड रूपैयाँको स्मार्ट फोन, १६ अर्ब १२ करोडको औषधीलगायत सामान आयात भएको हो ।

यसैंगरी चालु आर्थिक वर्षको सात महिनामा १६ अर्बको विद्युतिय गाडी आयात भएका छन् ।

७ महिनामा ६ हजार ४९० वटा विद्युतिय कार, भ्यान, जीप र मिनि बस आयात भएको हो । यसबाट १६ अर्ब ९ करोड ७ लाख ७५ हजार रुपैयाँ बाहिरीएको छ । यो गत आर्थिक वर्षको सोहि अवधिको तुलनामा करिब २०० प्रतिशतले बढी हो ।

सात महिनाको अवधिमा सिमेन्ट तथा क्लिंकरको निर्यात दुई अर्ब ६ करोड रूपैयाँ बराबरको भएको छ । गत वर्ष सात महिनाको अवधिमा १६ करोड ७० लाख रूपैयाँ बराबरको निर्यात भएको थियो ।

(39 पटक भ्रमण गरिएको, 1 भ्रमण आज)