आइसिसी विश्वकप क्रिकेट लिग–२ अन्तर्गत नेदरल्यान्ड्सले राम्रो प्रदर्शन गर्दै नामिबियामाथि ७ विकेटको शानदार जित हात पारेको छ।
त्रिवि क्रिकेट मैदान कीर्तिपुरमा जारी खेलमा १२४ रनको लक्ष्य पाएको नेदरल्यान्ड्सले जम्मा ३ विकेट गुमाएर लक्ष्य पूरा गरेको हो।
नेदरल्यान्ड्सले निर्धारित ५० ओभरमध्य २७ दशमलव २ ओभर खेल्दै ३ विकेटको क्षतिमा १२४ रन बनाएर जित हात पारेको हो।
नेदरल्यान्ड्सका लागि माइकल लेभिटले अर्धशतक पूरा गर्दै सर्वाधिक ५७ रनको पारी खेले भने म्याक्स ओ डडले २८ रन जोडे। ब्यास डि लिडेले २१ रन बनाए।
नामिबियाका लागि बर्नार्ड स्कल्ट्जले २ र र रुबेन ट्रम्प्लेमेनले १ विकेट लिए।
यसअघि टस हारेर पहिले ब्याटिङ्ग गर्ने निम्तो पाएको नामिबियाले खराब प्रदर्शन गर्दैै सबै विकेट गुमाएर १२३ रन मात्रै बनाउन सक्यो।
नामिबियाका लागि जेजे स्मीथले सर्वाधिक २६ रन बनाए भने रुबेन ट्रम्प्लेमेनले २० रन बनाए। अन्य कुनैपनि खेलाडीले २० रन समेत कटाउन सकेनन्।
नामिबियालाई सस्तोमै समेट्न नेदरल्यान्ड्सका आर्यन दत्त एक्लैले सबैभन्दा धेरै ६ विकेट लिए। आर्यनले जम्मा ६ रन खर्चेर एक ओभर मेडन ओभर गरे।
यस्तै काइली क्लेनले २ विकेट लिँदा म्याक्स ओ डड र रोयलफ भेन डर मेर्यूले १/१ विकेट लिए।
नामिबियाले यसअघि आफ्नो पहिलो खेलमा नेपाललाई पराजित गरेको थियो भने नेदरल्यान्ड्स नेपालसँग पराजित भएको थियो। हालसम्मको अवस्थामा जारी त्रिदेशीय खेलमा तीन वटै टोलीले समान एक/एक खेलमा जित हात पारेको छ।
प्रकाशित: ७ फाल्गुन २०८० १४:१२ सोमबार