भक्तपुरको चाँगुनारायण नगरपालिका क्षेत्र विपद्को उच्च जोखिममा रहेको जनाइएको छ। यही कारण नगरपालिकाले विपद् व्यवस्थापन सक्रिय बनाएकाे छ।
साथै वडा स्तरमा स्थानीय विपद् व्यवस्थापन समिति समेत गठन गरिएकाे छ। यस नगरपालिका क्षेत्रमा वडा ९ वटा वडाहरु रहेका छन्।
नगरपालिकाले सबै वडामा विपद् उद्धारका २६ प्रकारका सामाग्री सुरक्षित रुपमा राख्ने कार्य गरिएको जनाएको छ। साथै विपद्का वेला उद्धार गर्ने दस्तालाई समेत तालिम दिएर तयार पारेकाे छ।
नगर प्रमुख जीवन खत्रीले विपद् व्यवस्था ऐन समेत निर्माण गरिसकेको जनाए। नगरपालिकाले जुनसुकै बेला आइपर्ने विपद्का समयमा आर्थिक समस्या नहोस् भनेर तीन करोड रुपैयाँ बराबरको विपद् व्यवस्थापन कोषसमेत स्थापना गरेको नगर प्रमुख खत्रीले बताए।
उनका अनुसार विपद्बाट हुने क्षति कम भन्दा कम गर्ने उद्देश्यले रणनीतिक कार्ययोजना निर्माण गरिएको छ भने गाउँ वडातहसम्म पनि तालिमको व्यवस्था गरिएको छ। विपद् व्यवस्थापनकै लागि नगरपालिकाले चालु आर्थिक वर्षमा २८ वटा योजना अघि बढाएको उनले जानकारी दिए।
नगरपालिकाका प्रमुख प्रशासकीय अधिकृत चुरामणि पन्थीले विपद्का समयमा उद्धार तथा राहतका लागि काम गर्ने स्वयंसेवक दस्ता तयार गर्न लागेको जानकारी गराए।
नगरपालिकाको विपद् व्यवस्थापन समितिका संयोजक एवं चाँगुनारायण नगरपालिका वडा नं-२ का अध्यक्ष सोम प्रधानले चाँगुनारायणका ५, ६, ७ र ८ नं. वडामा बढी विपद्को जोखिम रहेको बताए। उनले नगरवासीहरूबाट प्राप्त हुने सुझावका आधारमा विपद्का क्षेत्रमा आगामी वर्षको कार्यक्रम तयार गरिने जनाए।
चाँगुनारायण नगरपालिकाका विपद् व्यवस्थापन विज्ञ दिनेश थापाले नगरपालिकाले विपद् व्यवस्थापनका क्षेत्रमा विभिन्न कार्यहरू गरेर विपद् जोखिमको न्यूनीकरणमा काम गरिरहेको जानकारी गराए।
नेपाल रेडक्रस सोसाइटीका उपनिर्देशक शिवराम गौतमले चाँगुनारायण नगरपालिकाजस्तै अन्य नगरपालिकालाई समेत विपद्का क्षेत्रमा काम गर्नका लागि झकझक्याउनुपर्नेमा जोड दिए।
सम्भावित जोखिमको न्यूनीकरणका लागि नगरपालिकाले वडा स्तरीय विपद् व्यवस्थापन समिति गठन तथा पुनर्गठन, नगर स्तरीय आपत्कालीन कार्यसञ्चालन केन्द्रको स्थापना, स्थानीय विपद् व्यवस्थापन कोष स्थापना (३ करोड), दमकल तथा एम्बुलेन्स सञ्चालन, नगर स्तरमा रहेको खुल्ला स्थान पहिचान एवं नक्सांकन, उद्धार सामग्रीहरु भण्डारण (नगरपालिकाको सभाहल हेल्मेट डाँडा), सुरक्षित आश्रयस्थल निर्माण (नगरपालिकाको सभाहल हेल्मेट डाँडा) र डकर्मी तालिम, समिति तथा कर्मचारीहरुलाई विपद् जोखिम न्यूनीकरण सम्बन्धी प्रशिक्षण, तालिम प्राप्त २३ जना डकर्मी जनशक्ति तयारी अवस्थामा राखिएको, प्रत्येक वार्डमा १० जनाका दरले खोज तथा उद्धार कार्य दल गठन गरिएको, वडागत रुपमा आधारभूत खोज तथा उद्धारका सामग्रीहरु भण्डारणमा रहेको नगरपालिकाले जनाएको छ।
विपद् व्यवस्थापन सामाग्री हस्तान्तरण
भक्तपुरको मध्यपुर थिमि नगरपालिकाका नगर प्रमुख सरेन्द्र श्रेष्ठको नेतृत्वमा सशस्त्र प्रहरी बल २२ नम्बर गण, भक्तपुर तथा नेपाली सेना भैरव बहान गुल्म, गठ्ठाघरलाई सोमबार एक कार्यक्रमबिच विपद् व्यवस्थापन सामाग्री हस्तान्तरण गरिएको छ।
मध्यपुर थिमि नगरपालिकाको कार्यालय मध्यपुर थिमिमा भएको कार्यक्रममा नगर उपप्रमुख विजयकृष्ण श्रेष्ठ, प्रवक्ता कृष्णहरि आचार्यलगायतका विशिष्ट व्यक्तिहरु सहभागी रहेका थिए।
विपद् व्यवस्थापन सामाग्रीका रुपमा विपद् व्यवस्थापनका लागि आवश्यक पर्ने विभिन्न सामानहरु रहेका थिए।
प्रकाशित: ८ माघ २०८० १८:२८ सोमबार